Loron Mundial ba Ema ho Defisiensia sira

LORON MUNDIÁL BA EMA HO DEFISIÉNSIA

“EDUKASAUN INKLUZIVU”

SelebrasIDD EhDaun Loron Mundiál Defisiénsia (International Disability Day), selebra tinan-tinan iha loron 3 Dezembru. Tinan 2014, ADTL organiza eventu ne’e iha formatu ne’ebé inkluzivu ho partisipasaun no mobilizasaun ida mak kolozál, envolve parte hotu ne’ebé iha interese bo’ot ba asuntu ema ho defisiénsia.

Asuntu ema ho defisiénsia presiza hetan atensaun públiku, la’ós de’it tanba ema ho defisiénsia kategoria grupu ida-ne’ebé mais marjinalizadu no la hetan atensaun, maibé mós tanba interese ema ho defisiénsia la tama iha ajenda prioridade sira hanesan asesu iguál ba edukasaun, tratamentu saude, formasaun profesionál no empregu, moris sosiál no asesu ba justisa.

Selebrasaun loron mundiál tinan 2014 ho tema “Edukasaun Inkluzivu”foti objetivu estratéjiku 3 hanesan aspeitu ne’ebé mak importante tebes ba ADTL ho nia membru tau ba konsiderasaun kampaña global ne’ebé foti. Objetivu tolu importante mak; Estabelese Konsellu Nasionál ba ema ho defisiénsia, implementa Planu Asaun Nasionál kona-ba direitu ema ho defisiénsia, Edukasaun Inkluzivu ba Ema ho Defisiénsia. Objetivu sira ne’e hotu mak sei asegura Timor-Leste hodi ratifika Konvensaun kona-ba Direitu Ema ho Defisiensia (UN-CRDP).

Hateten Selebrasaun IDD tinan 2014 ne’e kolozál tanba ADTL selebra loron mundiál ba EHD ne’e la’os deit ho aktividade long march maibe hahu kedas ho aktividade lubuk ida antes dia 3 Desembru. Aktividade sira importante ne’ebé mak ADTL organiza hodi atinji objetivu strategiku ADTL nian mak primeiru hala’o sorumutu ho ulun bo’ot sira, organiza mos Seminario Nasional ida kona-ba Estabelesementu Konsellu Nasional no Ratifikasaun ba UNCRPD, nune’e mos hamutuk Gabinete Primeira Dama organiza Jantar Fraternidade ida ho Sua Excelensia Presidente Republika, Sr. Taur Matan Ruak, no ikus liu mak ADTL ho nia membru sira organiza iventu long march ida iha dia 3 Dezembru 2014.

Antes aktividades sira nebee mak temin iha leten hala’o ADTL ho nia ekipa sira hahu faze preparasaun ida ho organiza komite organizadora hodi hahu sosializa selebrasaun ida nee ba media sira iha Timor hodi asegura kobertura nakonu hosi Radio Televizaun (RTTL) no revista nebee mak ejiste iha Timor-Leste ba atividade hotu hosi IDD.

 

REZOLUSAUN 1O ADOPTA IHA KONFERÉNSIA NASIONÁL ADTL NIAN

Selebrasaun IDD 2014, hahu ho Konferénsia Nasionál kona-ba Estabelesimentu Konsellu Nasionál no Ratifikasaun ba UNCRPD hala’o iha Hotel Ramelau, loron 25-26 Novembru 2014. Konferénsia ne’e halibur hamutuk partisipantes hamutuk atus ida resin ualu (108), hosi delegasaun membru organizasaun sanulu resin lima (15) hosi Dili no munisipiu. Partisipa mós hosi familia no kliente ema ho defisiénsia, parseiru dezenvolvimentu, pontu fokál defisiénsia hosi Ministériu no Sekretariu Estadu relevante nune’e mós reprezentante sosiedade sivil seluk no média.

Iha Konferénsia ne’e Exekutivu ADTL ho nia membru organizasaun sira adopta rezolusaun pontu 10 ne’ebé mak sai hanesan baze dadus nune’e ADTL ho nia membru sira hodi uza no halo kampaña ba asuntu defisiénsia nian iha Timor.

Konferénsia ne’e Abertura ofisiál hosi Vise Premeiru Ministru, Fernando Lasama de Araujo akompaña hosi Vise Ministru Solidaridade Sosiál, Jacinto Rigoberto ho Vise Prezidente Komisaun F, Eduardo Barreto Du’sae.

Partisipa no halo mós aprezentasaun sira hosi eskritóriu Altu Komisariadu Direitus Umanus (Office of High Commissioner for Human Rights/OHCHR) kona-ba prosesu ratifikasaun no relatóriu ba Konvensaun kona-ba Direitu Ema ho Defisiensia (UNCRPD), no mós hetan aprezentasaun hosi Konselleru ba Dezemvolvimentu nian hosi Embaixada Australia iha Timor-Leste. Hosi Vise Ministru Sosiál Solidaridade kona-ba planu no prepasaun sira hodi ratifika Konvensaun kona-ba Direitu Ema ho Defisiensia, Implementasaun hosi Planu Asaun Nasionál ba Defisiénsia, no mós Timor-Leste nia parte ba Incheon Strategy.

REZOLUSAUN ADTL NIAN

1.      Governu no Parlamentu Nasionál tenki tau asuntu defisiénsia hanesan asuntu prioridade nasionál ida entre seluk, no haktuir kedas ho asegura alokasaun orsamentál ida sensivel ba ema ho defisiénsia iha proposta orsamentál tinan-tinan.

2.      Imediatamente estabelese Konsellu Nasionál ida ba Ema ho Defisiénsia ho ninia estatutu independente, ho orsamentu rasik, ho lideransa ne’ebé hetan rekoñementu hosi Parlamentu Nasionál ho kompeténsia tomak hodi mobiliza kooperasaun inter-ministeriál, ho mandatu espesífiku hodi asegura implementasaun ba Planu Asaun Nasionál ba defisiensia no lejizlasaun sira kona-ba direitu ema ho defisiénsia nian.

3.      Ministériu Solidaridade Sosiál, Ministeriu Justisa no Parlamentu Nasionál tenki lalais kedas kria lei ida propriu kona-ba direitu Ema ho Defisiénsia ba dezenvolvimentu an rasik, reabilitasaun, protesaun, reintegrasaun, no empregu.

4.      Vise Premeiru Ministru no Konsellu Ministru tenki lalais kedas adopta no aprova Planu Asaun Nasionál ba Ema ho Defisiénsia 2014 – 2018 ne’ebé to’o agora sei kontinua pendente.

5.      Ministériu Edukasaun liuhosi kooperasaun ho instituisaun sira relevante tenki tau ba konsiderasaun opsaun sosiedade sivil nian hodi halo formasaun professor sira no kria eskola integradu no inkluzivu ho estandarte internasionál no asegura asesu ho diskriminasaun la’ek ba Ema ho Defisiensia hotu.

6.      Ministériu Solidaridade Sosiál, Ministériu Saude no instituisaun sira relevante tenki lalais kedas organiza rekursu tomak hodi responde ba nesesidade sentru reabilitasaun ba ema ho defisiénsia mentál no protesaun ba sira hasoru abuzu no violénsia.

7.      Ministériu Obra Públiku no instituisaun sira relevante tenki lalais kedas kria polítika no leis kona-ba Building Code (Kodigu Konstruksaun) no Building Permits (Lisensiamentu Konstruksionál) no asegura katak konstrusaun foun hotu, inklui konstrusaun privadu no fasilidade públiku hotu tenki iha fasilidade asesu ba Ema ho Defisiénsia.

8.      Sekretaria Estadu Formasaun Profesionál no Empregu, Ministériu Estatál no instituisaun sira relevante tenki lalais kedas kria programa sira ne’ebé fo dalan ba Ema ho Defisiénsia atu asesu ba formasaun empregu, kursu nivel superior no emprega iha funsaun públiku.

9.      Diresaun Nasionál Estatístika hosi Ministériu Finansa tenke asegura katak prosesu halibur dadus ba sensu tuir mai nian tenki envolve organizasaun ba ema ho defisiénsia, no asegura katak dadus kona-ba ema ho defisiénsia iha suku no área rurál hotu bele kobre.

10.  Komisaun F ho Parlamentu Nasionál tomak tenki lalais kedas organiza sesaun plenária ida hodi fo Estadu nian sintidu solidaridade ba Ema ho Defisiénsia liuhosi hamosu rezolusaun ida kona-ba hapara no kondena maka’as aktu abuzu seksuál hasoru feto defisiénsia mentál no hapara típu violénsia oioin hasoru Ema ho Defisiénsia mentál iha bairu hotu iha Timor-Leste.

 

Leave a Reply

Your email address will not be published. Required fields are marked *