Desportu Inklusivu ba Selebrasaun 20 de maiu

ADTL ORGANIZA DESPORTU INKLUZIVU BA SELEBRASAUN 20 MAIU

Ema hdesportu inklusivuo Defisiénsia hasoru situasaun ne’ebé susar tebes iha komunidade ne’ebé sira eziste. Alein sira hetan tratamentu diskriminativu, sira mós hasoru tratamentu sira la oportunu ka ne’ebé la fó espasu ba sira atu envolve iha aktividade sosiál sira seluk.

Papel ba mudansa perspektiva hasoru ema ho defisiénsia sai ona asuntu prinsipál ne’ebé Asosiasaun Defisiénsia Timor-Leste asumi. Papel importante ida-ne’e ADTL asumi hodi hasa’e konsiénsia públiku nian ka kontinua halo advokasia ba públiku no entidade estadu nian sira, atu oinsá bele fornese oportunidade ba ema ho defisiénsia no mós muda perspektiva sira-ne’ebé kontinua estereotipa asuntu defisiénsia

Tanba ne’e, ADTL organiza ninia membru sira partisipa iha eventu selebrasaun nasionál ba Loron Restaurasaun Independénsia 20 Maiu 2015. Partisipasaun ida-ne’e hala’o ho kompetisaun bola baskete kadeira roda no torneiu trisiklista, ne’ebé hahu iha loron 04 – 16 Maiu 2015. Eventu ida-ne’e foin maka dala-uluk akontese, tanba inklui ema ho defisiénsia no ema sein defisiénsia iha jogu basketebol kadeira roda, no torneiu trisiklista ne’ebé organiza husi Asosiasaun Defisiénsia Timor-Leste.

Ba oin, ADTL hanoin ona atu orienta ninia membru sira oinsá bele kria Federasaun Baskete Kadeira Roda Timor-Leste no Federasaun Trisiklista Timor-Leste. Atu ema ho defisiénsia bele iha partisipasaun liutan iha atividade sosiál sira no bele tuir mós torneiu ka kompetisaun mundiál banhira hetan konvite.

“ADTL sei sai hanesan parseiru ka organizasaun ne’ebé suporta de’it orsamentu hodi realiza eventu ne’e iha futuru. ADTL iha ona planu katak presiza harii federasaun bola-baskete kadeira roda no federasaun trisiklista ne’ebé inklui iha Komete Paralympics. Nune’e, iha futuru, ADTL sei la organiza tan eventu hanesan ne’e, tanba federasaun maka toma konta. Maibé só apoia de’it orsamentu hodi realiza eventu ne’e.” Rigoberto Monteiro General Manager ADTL hateten.

ADTL organiza eventu ida-ne’e atu hahu fó motivasaun ba ema ho defisiénsia no liu-liu lori sira atu partisipa iha atividade sira-ne’ebé sira bele halo, no oinsá bele hahu muda perspetiva sosiál hasoru ema ho defisiénsia. Tuir Ita-nia Konstitusaun RDTL artigu 21 hatete, Estadu iha dever atu promove no proteje sidadaun ho defisiénsia hodi asegura sira-nia partisipasaun iha vida sosiedade.

Sekretariu Estadu Joventude no Desportu Leovigildo Hornai afirma liu tan katak, dala-barak ema sempre hatuur defisiénsia hanesan objeitu ka nunka haree ba kapasidade ne’ebé ema ho defisiénsia iha. Afinál ema ho defisiénsia mós bele halo buat ne’ebé ita halo no sira bele halo di’ak liu duké ema sira sein defisiénsia.

“Sira hatudu sira nian kapasidade la’ós iha rai laran de’it. Sira reprezenta ona Timor-Leste iha eventu internasionál sira, no halo Timor-Leste ninia naran morin iha mundu.” Leovigildo hateten iha momentu entrega premiu (16/05).

Nu’udar partisipante no treinador ba kompetisaun bola-baskete kadeira roda Mateus Lucas realsa liu tan, eventu ne’ebé ADTL organiza hanesan dalan ida atu hatudu ba sosiedade no muda perspektiva katak, ema ho defisiénsia la’ós hela de’it iha uma. Maibé presiza fó oportunidade ba sira ka husik sira envolve iha aktividade sosiál sira hodi hatudu sira nian kapasidade.

“Ne’e kapas tebes! Só que, premeira vez ADTL organiza hodi selebra loron Restaurasaun Independénsia. Maibé ha’u hanoin ne’e sei sai di’ak liu tan iha futuru, no hahu fo motivasaun ba ema ho defisiénsia atu sai ativu liu tan iha vida sosiedade nian.” Mateus Lucas, Ema ho Defisiénsia Fiziku, hateten iha eventu ne’ebá.

ADTL espera membru ekipa kompetisaun bola baskete kadeira roda, hafoin eventu refere, kria ona federasaun ba modalidade hirak ne’e, hodi oraginza eventu sira nasionál no partisipa iha eventu inetenasionál. Tanba ne’e, ekipa sira-ne’e presiza kria kongresu iha futuru ka organiza malu atu hahu hanoin ba asuntu ne’e, no presiza atu organiza nafatin eventu sira hanesan ne’e, hodi inklui ema ho defisiénsia iha atividade sosiál sira. ##

 

Leave a Reply

Your email address will not be published. Required fields are marked *