Ema Ho Defisiénsia Barak Liu Hetan Violasaun

Ema Ho Defisiénsia Barak Liu Hetan Violasaun

 

Partisipante sira ne’ebé partisipa kolókiu treinamFormasaun Violasaun  Direitu EhDentu durante loron ha’at. Fot. ADTL.

Asosiasaun Defisiénsia Timor-Leste (ADTL) serbisu hamutuk ho Nasoens Unidas ba Direitus Humanus (UNHR) hala’o kolókiu treinamentu loron ha’at ba pesoal organizasaun sira-ne’ebé serbisu iha area defisiénsia. Treinamentu ne’e hala’o iha sekretariadu PRADET iha loron 25 – 28 Maiu 2015, ho objetivu atu hafahe no hasa’e koñesimentu pesoal organizasaun membru sira kona-ba atendimentu kazu hasoru ema ho defisiénsia no oinsá atu refere kazu ne’ebé ema ho defisiénsia hasoru.

Iha abertura treinamentu, Rezidente ONU nian iha Timor-Leste Knut Otsby afirma, Nasoens Unidas konsidera Ema ho Defisiénsia importante iha sosiedade no husu atu Estadu parte sira tenke asigura katak ema ho defisiénsia asesu ba aspetu hot-hotu haktuir Konvensaun Nasoens Unidas nian ba Direitu Ema ho Defisiénsia.

Liutan Knut informa, ema ho defisiénsia barak liu sai risku ba violasaun direitus umanus, no tanba ho sira nian kondisaun defisiénsia hanetik sira-nia partisipasaun iha sosiedade. Maibé dalabarak tebes ema lahó defisiénsia maka sai bareira ba ema ho defisiénsia, hodi hasusar sira atu asesu ba buat ne’ebé sira presiza.

General Manager ADTL Rigoberto Monteiro mós iha biban ne’e afirma liutan katak, iha Timor-Leste ita sai sasin ba eventu violentu barak hasoru ema ho defisiénsia. Ema ho Defisiénsia mós holaparte iha komunidade vulnerável liu iha mundu. Tanba ho defisiénsia, ema sira-ne’e hasoru bareira barak tebes, no susar liutan banhira estadu la preokupa ho problema ne’ebé afeta ba sira-nia moris no nesesidade.

Ho razaun hirak ne’e, Rigoberto husu partisipante sira atu partisipa ho vontade di’ak hodi aprende no hatene oinsá atende kazu ne’ebé ema ho defisiénsia hasoru. Nune’e bele fasilita ema ho defisiénsia asesu ba justisa ne’ebé justu, no esforsu atu halo komunidade bele kompriende vida ema ho defisiénsia.

Durante treinamentu, partisipante sira kestiona liu lei espesífiku ba defisiénsia nian iha Timor-Leste, nune’e bele fasilita ema ho defisiénsia asesu ba justisa no bele regula no fó justisa loloos ba ema ho defisiénsia. Tanba to’o oras ne’e, Estadu Timor-Leste seida’u ratifika Konvensaun ONU nian ba Direitu Ema ho Defisiénsia, maske Estadu promete ona atu ratifika iha tempu badak.

Haree ba ida-ne’e, partisipante sira konsidera estadu la-tau prioridade ba ema ho defisiénsia ninia direitu tuir konvensaun ne’ebé ONU produs tiha ona.

“Ha’u-nia maluk feto sira ho defisiénsia barak liu sai vitima ba violensia. Balun hosi sira hetan violénsia seksuál no tantu fíziku, maibé sira lahetan justisa ne’ebé justu. Tanba to’o oras ne’e suspeitu mós lahetan no kazu sira-ne’e sai lakon sein konfirmasaun.” Gaspar Afonso hateten. “Ha’u hatete ba imi! Ha’u sei ko’alia maka’as liutan, nunka para, bainhira ko’alia kona-ba defisiénsia. Ha’u hakarak lian ne’ebé lakon hahu rona. Justisa tenke la’o ba ema hotu, no ema hotu iha direitu atu asesu ba justisa.”

Tuir informasaun ne’ebé relata husi ASIA Foundation, ema ho defisiénsia iha mundu hasoru violensia maka’as liu duke ema sira ne’ebé la-ho defisiénsia. Dadus ida husi nasaun seluk iha mundu fó sai katak 15 porsentu ema ho defisiénsia hasoru violensia loro-loron iha mundu. ##

Leave a Reply

Your email address will not be published. Required fields are marked *